Dita Botërore e Punëtorëve që nisi si protestë për të kërkuar respektimin e të drejtave në punë, e ka humbur simbolikën e saj në Shqipëri ku kjo ditë është pushim zyrtar. Ajo është pushim më tepër për punonjësit e administratës shtetërore, por jo për sektorin privat.
Nisur nga ditët e pushimit, për shqiptarët numërohen 32 ditë pushimi të paguara, nga festat e Vitit të Ri deri tek Dita e Flamurit apo lejet vjetore.
“ Sipas Kodit të Punës, në Shqipëri janë 20 ditë pune leje vjetore, apo 28 ditë kalendarike. Ndërsa festa zyrtare numërohen 12.”, shkruan revista “Monitor”.
Në Shqipëri, bizneset private nuk e respektojnë tërësisht Kodin e Punës dhe jo të gjithë përfitojnë plotësisht nga leja vjetore, duke detyruar shumë prej tyre të dalin në punë edhe gjatë fundjavave.
Me këtë përllogaritje të ditëve zyrtare të pushimit, shqiptarët renditen në mesataren e vendeve të Europës. Sipas një harte të publikuar nga Wikipedia, në krye të klasifikimit me më shumë ditë pushimi të paguara qëndron Austria me 41 ditë, e ndjekur nga Finlanda, Franca dhe Spanja me 36 ditë pushimi. Në vend të tretë Italia me Gjermaninë, Zvicrën dhe Mbretërinë e Bashkuar me 32 ditë pushimi aq sa dhe Shqipëria. Ndërsa Holanda ka vetëm 20 ditë pushimi të paguara.
Në rajon, shtetet më punëtore janë Mali i Zi dhe Greqia.
(XH.A/SHUPLAKA)
Discussion about this post