Ministria serbe e drejtësisë ka dërguar kërkesën zyrtare për ekstradimin e Haradinajt te autoritetet franceze. Një gjë që pritej të ndodhte këto ditë, ndërkohë që Haradinaj qëndron në paraburgim me vendim të Gjykatës në Colmar të Francës.
Bashkë me kërkesën është paraqitur edhe dokumentacioni shoqërues në gjuhën frënge, ku bëhen të ditura akuzat që qëndrojnë pas kësaj kërkese.
“Gjykata e apelit e Francës vendosi se Ramush Haradinaj të mbetet në paraburgim derisa Serbia të dërgojë një kërkesë zyrtare për ekstradim”, ka shtuar më tej ‘Kurir’.
Pak më herët reagoi dhe Maja Kocijancic, zëdhënësja e përfaqësueses së Lartë të Bashkimit Europian, Frederica Mogherinit. Zëdhënësja theksoi se palët duhet t’i përmbahen një klime normalizimi, ndërsa policitë e dy shteteve duhet të bashkëpunojnë me njëra-tjetrën. Ndër të tjera ajo shtoi se Serbia dhe Kosova duhet të shkëmbejnë informacione.
Ndërkohë, dje Arianit Koci, avokat i ish-kryeministrit të Kosovës, Ramush Haradinaj, u shpreh se klienti i tij mund të lirohet me kusht të enjten, ditë kur edhe është caktuar të mbahet seanca gjyqësore ndaj tij. Sipas Kocit, lirimi me kusht i Haradinajt, nënkupton që ai të jetë i lirë në Francë, por jo edhe të kthehet në Kosovë, pa dhënë vendimin përfundimtar Gjykata e Apelit në Francë. “Haradinaj, pritet që të lirohet me kusht të enjtën e kësaj jave, në ditën kur do të mbahet seanca gjyqësore ndaj tij”, ka thënë Koci. (E.K/SHUPLAKA)
Discussion about this post