Ambasadorja e Gjermanisë në vendin tonë Susanne Schutz ka mbërritur para pak minuta në selinë blu, ku do të zhvillojë një takim me kreun e demokratëve Lulzim Basha. Pas saj po në zyrën e Bashës ka mbërritur dhe ambasadori i BE-së, Luigi Soreca.
Lëvizjet e ditëve të fundit, ku opozita ka kërcënuar dhe ka vendosur djegien e mandateve duket se kanë vënë në lëvizje dhe ndërkombëtarët që janë në vendin tonë.
Po në ndryshim nga qendrimi në Facebook i Ambasadës Amerikane, që iu kërkonte deputetëve të hiqnin dorë nga djegia e mandateve, gjermanët janë treguar më të rezervuar për të shprehur qëndrimin e tyre publikisht.
‘’Një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese. Kërcënimet nga Partia Demokratike, Lëvizja Socialiste për Integrim dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme.
Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet e tyre dhe të mbrojnë idealet dhe parimet që janë me rëndësi thelbësore për çdo demokraci të fortë. Nëse dështoni të bëni punën tuaj, do të zhgënjeni njerëzit të cilëve keni privilegjin tu shërbeni”, deklaronte dje ambasada e SHBA-ve.
Kujtojmë që opozita kërkon një qeveri tranzitore, pa Edi Ramën kryeministër, e cila do të përgatisë vendin drejt zgjedhjeve të parakohshme, dhe të pandikuara nga paratë e krimit.
Gjermania është një nga shtetet më skeptike sa i takon qeverisjes së Edi Ramës, duke e konfirmuar këtë dhe me qëndrimin e saj për mosçeljen e negociatave me Shqipërinë.
Pak ditë më parë ambasadorja Schutz zhvilloi një takim dhe me ish-ministrin e jashtëm Ditmir Bushati, i cili ka qenë një nga politikanët më të pëlqyer në Berlin, ç’ka u interpretua si një injorim që u bë në drejtim të kryeministrit Rama.
(E.K/FAXWEB.AL)
Discussion about this post