Ka nisur kampingu i të rinjve të LSI-së në Jalë, por këtë vit ndryshe nga çdo herë tjetër ata e kanë nisur me akuza për të rinjtë e FRESSH-it që para pak ditësh u larguan. Qindra të rinj të LRI-së e kanë nisur aktivitetin e tyre pikerisht duke pastruar ambientin e lënë pis nga të rinjte e FRESSH-it, që sapo kanë perfunduar takimin e tyre.
600 të rinj dhe të reja nga e gjithë Shqipëria do të marrin pjesë në kampingun veror të LRI-së që zhvillohet nga data 20-25 gusht. Ndërkaq kryetarja e LSI-së, Monika Kryemadhi nuk ka ngurruar të thumbojë Forumin Rinor të PS-së, jo vetëm për “kopjim”, por edhe për katastrofën që lanë pas.
“Ka nisur sot kampingu politik i të rinjve të LSI-së, një traditë e bukur e huazuar dhe nga forumet e tjera të ngjashme, të cilat megjithatë nuk kanë mundur të “kopjojnë” dot aksionin dhe motivimin tonë, ku debatet dhe diskutimet nuk rreshtin as në orët e nxehta të ditës dhe as në ato të mbrëmjes.
Këto janë ditët kur të rinjtë mësojnë vlerat e politikës, por jo vetëm. Janë ditët kur ata “stërviten” për të qenë mbi të gjitha njerëz të mirë dhe qytetarë të ndershëm. Janë ditët dhe netët, kur edhe ne që jemi aty për t’i ndihmuar, dëgjojmë dhe mësojmë shumë për rininë, kërkesat dhe dëshirat e saj. Për ti dhënë këtij vendi një mundësi më të mirë, një shans më shumë dhe këtë padyshim do e bëjnë të rinjtë”, u shpreh ajo.
(J.D/Faxweb.al)
