Që ajo do të ishte një nga ndeshjet më të ndjekura, dihej që në hedhjen e goglave gjatë shortit, po që të kishte një interesim kaq të jashtëzakonshëm edhe nuk mund të merrej me mend.
Kërkesat për ta parë nga afër ndeshjen në shtëpi të PSG-së ndaj Real Madridit në Ligën e Kampionëve janë të shumta dhe biletat në Parc des Princes janë shitur të gjitha, kurse çmimi në tregun e zi për ri-shitje shkon deri në 14 mijë euro.
Klubi ka njoftuar ditë më parë se janë shitur të gjitha biletat për këtë ndeshje, edhe pse është ndeshje kthimi.
“Ju informojmë se nuk ka më bileta për ndeshjen mes PSG-së dhe Real Madridit”, thuhet në njoftimin e klubit. “Megjithatë ju mund të blini bileta në ‘Ticketplace”, që është faqe zyrtare për rishitje të klubit”.
Kur kanë mbetur edhe tre muaj nga kjo ndeshje dhe rezultati i ndeshjes së parë nuk dihet, biletat në tregun e zi shkojnë nga 315 euro në 14,695 euro. Para kësaj ndeshje, ndeshja e parë zhvillohet në Santiago Bernabeu me 14 shkurt, ndërsa edhe Real Madridi ka njoftuar përmes faqes së saj që nuk ka më bileta për këtë ndeshje.
(E.K/FAXWEB)
