Autoritetet shtetërore maqedonase i kanë kërkuar ambasadores serbe në Shkup që të shpjegojë praninë e këshilltarit të kësaj ambasade në sulmet e dhunshme brenda Kuvendit të Maqedonisë më 27 prill, raporton VOA.
Goran Zhivaljeviç është njëkohësisht oficer i shërbimit serb të zbulimit, BIA.
Ambasadorja, Dushanka Divjak-Tomiç pritet brenda ditës së premte të shpjegohet në Ministrinë maqedonase të Punëve të Jashtme lidhur me incidentin.
Kryeministri serb Vuçiç pas një takimi të shkurtër me kryeministrin e mandatuar të Maqedonisë, Zaev, të mërkuren në Bruksel, është shprehur se agjenti Zhivaljeviç nuk ka kryer ndonjë vepër penale me praninë e tij në turmë, “sepse kjo është detyrë e tij”.
Edhe ministri i jashtëm serb Daçiç është shprehur njësoj, se “këshilltari i Ambasadës ka qenë aty për të parë nëse ka shtetas serbë të përfshirë në ato zhvillime”.
Zaev shprehet se shpreson se shërbimet përkatëse do të japin përgjigje mbi rolin e agjentit serb në ngjarjet e përgjakshme të 27 prillit.
(M.D/Shuplaka)
