Një shpërthim gazi ka ndodhur paraditen e sotme në minierën e Kromit në Bulqizë, si pasojë e të cilit kanë mbetur të plagosur tre punonjës, ndërsa dyshohet se tre persona të tjerë kanë humbur jetën.
Fillimisht u raportua se tre personat kanë mbetur të bllokuar në minierë, por për shkak se orë të tëra kanë kaluar, dhe pavarësisht se kërkimet vazhdojnë dhe tre punonjësit nuk janë gjendur ende, dyshohet që ata të kenë humbur jetën. Mësohet se tre të plagosurit dhe tre të humburit, janë të gjithë punonjës kinezë.
Tre minatorët e plagosur janë dërguar me urgjencë në spitalin e Bulqizës, ku ndodhen jashtë rrezikut për jetën. Ndërsa për të humburit kërkimet ende vazhdojnë, por grupet e shpëtimit nuk arritën të futen në nivelin e 21-të ku ndodhi shpërthimi i gazit metan, atje ku mendohet se gjenden minatorët.
Ndërkohë, operacioni i kërkim-shpëtimit është ndërprerë gjatë natës, dhe do rinisë sërish nesër në mëngjes.
Grupet e gatshme të avarive në ambientet e minierës kanë ndërhyrë menjëherë pas shpërthimit, ndërkohë nga Tirana janë nisur edhe zv.ministri z. Gëzim Musabelli, grupet e Repartit të Inspektim Shpëtim Minierave, drejtues të strukturave të mbikëqyrjes së minierave në Ministrinë e Energjisë dhe Agjencinë Kombëtare të Burimeve Natyrore. Në vendngjarje ka shkuar edhe mbasadori kinez në vendin tone, i cili ka inspektuar situatën në minierën e Bulqizës. (D.D/Shuplaka)
