Shpëtim Idrizi: Vendi është në krizë, propozoj pakt kombëtar për drejtësinë e integrimin

Kreu i Partisë PDIU, Shpëtim Idrizi  propozon një pakt kombëtar bashkimi për reformën në drejtësi dhe integrimin europian.

Gjatë një takimi me strukturat e partisë së tij në Tiranë, Idrizi theksoi se kriza nuk është vetëm tek çadra e opozitës, por në të gjithë vendin.

“Kriza politike nuk është vetëm te çadra, por kudo. Reforma në drejtësi është bllokuar. Kriza politika kalohet vetëm me reformën në drejtësi. Ne nuk e dhamë votën sepse na trembin kushtet, por sepse duam drejtësi.Besojmë se kjo reformë do të jetë pozitive për të gjithë shqiptarët. Rithemelimi i republikës së re vjen vetëm me reformën. Ajo rivendos në themelet e duhura të gjithë sistemin politik shqiptar. Jemi gati të ulemi me këdo, vetëm që të çojmë përpara këtë reformë.Rruga në Europë zgjidh krizën në vend. Propozoj pakt kombëtar bashkimi për reformën në drejtësi dhe integrimin”, tha Idrizi.

Kreu i PDIU-së tha se mbështesin koalicionin qeveritar, por kjo nuk do të thotë që vota e tyre është e verbër.

“Hymë në këtë aleancë pasi na u kërkua të mbështesnim reformën administrative. Na kanë sulmuar që jemi pjesë e kësaj aleance qeverisëse. Çështja çame nuk ka qenë asnjëherë në këto nivele” u shpreh Idrizi.

Idrizi tha po ashtu se makina elektorale e PDIU-së tashmë është ndezur zgjedhjet e 18 qershorit.

(M.D/ Shuplaka)