Shpëtoi djalin 9-vjeçar që po mbytej në det, roja bregdetare rrëfen ngjarjen

Pas ngjarjes në Sarandë, ku një djalë 9 vjeçar nga Kosova arriti t’i shpëtojë vdekjes vetëm falë ndërhyrjes së një roje bregdetare.

Ky i fundit, në një prononcim për Balkanweb, rrëfen se ishte duke e ruajtur djalin pasi e kishte kuptuar se nuk dinte not.

 “Djalin e pashë që nuk dinte mirë not dhe po e ndiqja me sy. Por, në një moment më humbi nga sytë. U nisa direkt dhe u zhyta për ta shpëtuar, e më pas e nxora në breg”, shprehet roja Ndriçim Rako.

Familja e djalit megjithëse e tronditur ka falënderuar shërbimin e Rojës Bregdetare dhe vetë të riun që shpëtoi djalin e tyre. Fatmirësisht 9-vjeçari nuk pësoi asnjë lëndim dhe vazhdon të shijojë pushimet me prindërit në Sarandë.

Kujtojmë se ngjarja ka ndodhur në plazhin e centralit në Sarandë, ku Rako shpëtoi nga mbytja 9-vjeçarin Arbërin Kreshnikaj.

Sakaq, sjellim ndërmend gjithashtu se vetëm 10 ditë më pare, 3 të rinj u mbytën në plazhin e Zvërnecit, në Vlorë, ku nuk ka fare roje bregdetare. (D.D/Shuplaka)