Spitali Bashkiak Mirditë, Koçiu: Infrastrukturë moderne, i shërben 15 mijë banorëve të zonës

Ministrja e Shëndetësisë dhe Mbrojtjes Sociale, Albana Koçiu tha sot se spitali Bashkiak Mirditë është kthyer në një qendër kyçe të shërbimit shëndetësor në veri të vendit, falë investimit në pajisje dhe infrastrukturë.

Ministrja theksoi se ky spital i shërben rreth 15 mijë banorëve të zonës, ndërsa shërbimet që ofrohen janë Shërbimi i Urgjencës; Mjekësia e Përgjithshme; Pediatria; Obstetrikë-Gjinekologjia; Kirurgjia e Përgjithshme, përfshirë sallën e operacionit; Laboratori Klinik Biokimik; Radiologjia dhe Poliklinika.

“Modernizimi i infrastrukturës është shoqëruar me pajisje mjekësore të teknologjisë së fundit, duke siguruar shërbim cilësor për qytetarët”, shprehet ministrja në një postim në Facebook.

Ministrja Koçiu më herët ka deklaruar se buxheti për shëndetësinë do të mbështesë programin 3-vjeçar, për vijimin e rehabilitimin e plotë të 107 qendrave shëndetësore në të gjithë vendin për periudhën 2025-2027.

Koçiu renditi edhe kantieret investuese në shëndetësi që hapen për herë të parë në vitin 2025 si, ndërtimi i godinës së re multifunksionale të Spitalit Rajonal Korçë, rikonstruksion i godinës së Djegie-Plastikës në QSUNT, rikonstruksion i materniteteve në Fier dhe Shkodër si dhe të spitaleve në Pogradec dhe Lushnje.