Stadiumet e së ardhmes, ndenjëse me vibrim dhe birrë me dron

Media britanike “theguardian.com”, ka bërë një përmbledhje të ideve që pritet të aplikohen në stadiumet e së ardhmes.

Disa nga idetë janë të veçanta dhe të pabesueshme por me përparimin e teknologjisë nuk duken aq të pamundura.

Hologramë

Projekti është impresionues dhe ambicioz. Po mendohet që në të ardhmen, ndeshjet të mos transmetohen vetëm nëpërmjet televizorit, por edhe me hologramë. Ideja e ekspertëve është që të krijohen stadiumet virtualë.

Ky sugjerim, i cili është propozuar në vitin 2010 në Japoni, parashikon mundësinë për një tifoz nga cilido qytet, të shkojë në sheshin që ka pranë, të ulet në tribunën që sapo është ndërtuar dhe ta shikojë ndeshjen me hologramë. Drejtpërsëdrejti, sikur ai të ishte në stadiumin ku luhet ndeshja, në çdo cep të botës.

Kamera 360 gradë

Në stadiumet e Europës pritet të vihet një, ose më shumë, televizor 360 gradë rreth e përqark impiantit që të transmetojë ndeshjen. Të mendosh se ky televizor duhet të mbulojë plot 335 metra, pasi kaq është një rrotullim i plotë rreth stadiumit. Modeli që do të ndiqet, është ai i impiantit “Atlanta Falcons”, që ka kushtuar 1.6 miliardë euro. Dhe surprizat pritet që të mos mbarojnë këtu…

Ulëse speciale

Kjo do të ishte me të vërtetë një ide gjeniale. Po flasim për ato ulëset që kushdo i ka parë apo provuar, nëse u ka ndodhur që të udhëtoni me avion.

Në këtë mënyrë të gjithë tifozët do ta harronin problemin me stolat që gjenden tashmë nëpër stadiume, që janë gjithçka përveçse të rehatshme. Për çdo tifoz të sportit, ky është një lajm sensacional, pasi do ta ndiqte ndeshjen si të ishte në shtëpi.

Birra vjen me dron

Për të gjithë fansat e birrës, ky shërbim do të ishte me të vërtetë i veçantë. Po mendohet që në të ardhmen birra të shpërndahet me anë të një droni. Kjo është një ide që është dhënë nga tifozët, të cilët duan diçka më të veçantë nga shërbimi nëpër stadiume. (B.H/Shuplaka)