Edhe pse disi me vonesë, Partia Demokratike ka dënuar sulmin terrorist në klubin e natës në Stamboll mesnatën e 31 dhjetorit dhe 1 janarit, ku u vranë 39 persona dhe u plagosën dhjetra të tjerë.
Në një deklaratë për mediat, selia blu solidarizohet me popullin turk dhe shpreh mbështetjen në çdo betejë për të mbrojtur vlerat demokratike.
Deklaratë e Partisë Demokratike
Partia Demokratike dënon me forcë aktin terrorist që goditi Turqinë duke lënë 39 viktima dhe shumë të plagosur natën e ndërrimit të viteve.
Duke shprehur dhimbje dhe ngushëllime për familjet e viktimave, Partia Demokratike rikonfirmon mbështetjen dhe solidaritetin e plotë me popullin dhe autoritetet turke duke theksuar se do të jemi përherë në krah në çdo betejë për liri dhe vlera demokratike. (A.R/SHUPLAKA)
