Karikaturisti me famë ndërkombëtare, Agim Sulaj ka treguar për Fax News sensibilitetin që kanë treguar artistët nga shumë vende të botës për ngjarjen që tronditi Shqipërinë me 26 Nëntor ku një tërmet i fuqishëm shkaktoi dëme të mëdha në njerëz dhe banesa.
Sulaj tha se artistët nga 45 vende të botës kanë sjellë art “Shqipëria e pas tërmetit”, ndërsa theksoi se ideja e kësaj nisme të nisur prej tij ishte organike dhe lindi menjëherë pas ngjarjes.
Sipas tij, tërmeti i 26 Nëntorit është bërë simbol i solidaritetit dhe mbështetjes që kanë dhënë artistët nga e mbarë bota për Shqipërinë, duke e hedhur në letër dhe bërë publike në vendet e tyre dramën që kaluan shqiptarët.
“Ndjeja të bëja diçka edhe unë për atë që ndodhi. Mendoj se gjithkush ka bërë diçka në të tijën sipas edhe profesionit që ka ndaj unë bëra një thirrje ndaj artistëve dhe miqve që njihja. Nuk e imagjinoja një përmasë aq të madhe që do të merrte situata. E shpalla konkursin me datë 3 dhe deri në datë 7 kisha kohë, dhe pse kaq pak kohë çuditërisht ndodhi ajo gjë që doja të ndodhte, fjala ‘solidaritet’. Kur solidariteti dhe arti kombinohen me njëri-tjetrin bëjnë gjëra të mrekullueshme. Pikërisht me këto punime do të bëjmë një ekspozitë ndërkombëtare në Tiranë. Karikatura ndryshe nga letërsia flet me mesazhin dhe krahasimin e imazheve.
Nisma që kemi marrë është e hapur, kanë sjellë krijime artistë nga gjithë bota, nga të gjitha moshat, madje kemi edhe karikatura fëmijësh që na kanë ardhur nga fëmijët që kanë përshkruar tërmetin dhe situatën e krijuar pas tij. Këtë vit prezantoj krijimet e mija mbi Tiranën, Durrësin, Beratin etj që do të promovohen me datë 12 Dhjetor tek “Plaza” në Tiranë. Çdo tre muaj jam vlerësuar me çmime ndërkombëtare, në Itali, Hollandë, Brazil, Itali. Doja që përmes ftesës tuaj dashamirëse të flisja edhe për nismën time por edhe për anën time profesionale sepse një herë në vit vij në Shqipëri. Shpresoj që pas kësaj situate të ruajmë këtë komunikim me njëri-tjetrin, të ruhet solidariteti, humori që është arma më e fuqishme”, tha Sulaj.
(F.GJ/FAXWEB.AL)
