Nga Arben Vata*
Pavarësisht propagandës së shfrenuar në media dhe Facebook, edhe vetë Edi Rama është i sigurtë që këtë herë nuk i ka 1 milion votat që ai në krye të koalicionit të majtë mblodhi 4 vjet më parë. Ikja e ashpër e LSI, është domethënëse për rezultatin e PS në këto zgjedhje.
Votat e LSI, në variantin më të mirë për PS, janë të paktën aq sa ishin në 2013. Nga ana tjetër, vetëm një Idiot nuk e kupton se votat e PD janë rritur ndjeshëm. Jo vetëm për shkak të sukseseve politike të kësaj partie, por edhe për shkak të dështimeve, korrupsionit dhe mos mbajtjes së premtimeve nga ana e kryeministrit. Sipas kësaj logjike të thjeshtë, PS do të pësojë një ulje të konsiderueshme të votave në këto zgjedhje.
Nga ana tjetër, nuk është sekret të theksohet se shqiptarët më së shumti votojnë majtas. Historia zgjedhore në këto 27 vjet këtë ka treguar. Shuma e votave të së majtës në me të shumtën e rasteve ka qenë më e madhe sesa votat në thesin e së djathtës. Tjetër gjë pastaj se e majta shpesh është përçarë dhe kjo ka çuar në një qeverisje të drejtuar nga e djathta. Nuk është çudi që kjo të ndodhë sërish edhe këtë herë.
Kryeministri I trembet PD por edhe LSI. Megjithatë ai më shumë i trembet votuesit të lëkundur apo shtesës së atyre që nuk votojnë fare pasi janë të zhgënjyer nga politika. Pak ditë më parë, ai u kërkoi atyre që të votojnë, pavarësisht se për kë. Në fakt, Rama e njeh mirë mentalitetin e shqiptarëve, të cilëve nëse u kërkon të të bëjnë diçka, ata bëjnë të kundërtën.
Rama pikërisht këtë dëshiron. Që të pavendosurit të mos votojnë, sepse ata janë përgjithësisht vota kundër qeverisë. Ndaj Rama nuk i do ata që të votojnë të dielën e 25 qershorit. Nuk është çudi që edhe votimet të jenë lënë qëllimisht për Bajram. Një qeveri që ka qeverisur keq, ka interes që njerëzit të mos dalin në votime.
Qeveria e di se për të voton si garnizon ushtarak administrata si dhe votuesit tradicionale. E majta e ka praktikë të hershme këtë punë, kurse kjo nuk mund të thuhet për të djathtën,e cila është më liberale edhe kur është fjala për votën. Por vota është mjeti i vetëm nëpërmjet të cilit qytetari ushtron pushtetin e vet, njëherë në dy ose katër vjet.
Nëse qytetarët mendojnë se janë më mirë gjatë këtyre katër viteve, nëse mendojnë se qeveria ka mbajtur premtimet, nëse mendojnë se nuk pasur krim dhe korrupsion, (ashtu siç thotë opozita por edhe LSI), atëherë të votojnë sërish këtë qeveri. Nëse mendojnë të kundërtën, të votojnë për ta larguar atë nga zyrat e pushtetit.
Gjithsecili në familjen e vet është në gjendje të bëjë bilanc për katër vjet, pa u ndikuar prej preferences politike. Është mirë të kuptojmë se në parlament dhe në qeveri futen vetëm ata që i shohim në radhët e para të fushatës.
Ne te tjerët që votojmë, nuk na bie kurrë radha të përfitojmë pushtet direkt nga fakti që fiton partia që ne votuam. Populli i thjeshtë sërish do të bëjë llogaritë e muajit në familje sapo të mbarojnë zgjedhjet. Janë vetëm një grup I vogël që bën llogaritë e pushtetit. Ndaj është mirë që ta përdorim votën për vete. Për të ndëshkuar ata që gënjejnë dhe për tu dhënë shansin atyre që me programin e tyre premtojnë ndryshim.
Në të kundërt, askush nuk ka pse ankohet për qeverinë që ka.
As qeveria nuk ankohet në këtë rast për popullin qe ka, sepse është ky popull qe e mban atë në pushtet. Popullin nuk e ndërrojmë dot. Por qeverinë mundemi, sa herë që ajo gabon. Dhe kjo ka ndodhur, edhe pse në ndonjë rast me vonesë.
