Zëvendëskryeministri Peleshi është caktuar në krye të aksionit antikanabis në vend. Në fjalën e tij të sotme ai u shpreh se në aksionin për të luftuar kanabizimin e vendit do të përfshihet dhe ushtria.
Këtë vendim për ndërhyrjen e ushtrisë e ka përshëndetur dhe ish-ministri i Drejtësisë Ylli Manjani. Ai u shpreh se Peleshi është i vetmi që dëgjon nga qeveria Rama.
‘’E përshëndes zv/Kryeministrin që pranoi sugjerimin tim për futjen e ushtrisë në luftën anti-kanabis. Zoti Peleshi është i vetmi që dëgjon!’’, shkruan Manjani.
Ndërkohë Peleshi paralajmëroi se “duke nisur nga ky vit të gjitha strukturat, Policia e Shtetit etj. do të ndërmarrin një operacion të koordinuar”. “Në operacion do të përfshihen shërbimet e policisë, shërbimet inteligjente, ushtria, të bujqësisë, mjedisit. Masa serioze ndaj të gjithë zyrtarëve që nuk arrijnë të mbajnë në administrim territorin”, deklaroi Peleshi.
Ai tha se bashkëpunimi ndërkombëtar është prioritet në përpjekjet kundër kanabisit.
“Viti 2017 do shënojë pa asnjë dyshim një kulm kundër kanabisit në Shqipëri. Mirëqenia e vendit bazohet tek puna e ndershme dhe respektimi i ligjit. Kjo është një ftesë e sinqertë për të bashkuar të gjitha forcat, jo vetëm qeverisë por e të gjithë popullit. Kjo nuk është një betejë e përkohshme, kjo nuk përfundon asnjëherë. Por ky vit është në objektivitetin e planit për një kulm pozitiv në luftën kundër drogës”, tha Peleshi. (E.K/SHUPLAKA)
