Kryetari i Bashkisë së Tiranës, Erion Veliaj, ka inspektuar së fundmi punimet për rikonstruksionin e plotë të godinës së vjetër të kinemasë në njësinë 11, që prej vitesh ishte jofunksionale.
Gjatë ndjekjes së punimeve, kreu i bashkisë u shpreh se ky është një tjetër premtim i mbajtur që i shërben afro 60 mijë banorëve të zonës.
Kryebashkiaku Veliaj vlerësoi se me projektet e Bashkisë së Tiranës, Lapraka është duke marrë një profil tjetër, duke pasur tashmë spital publik dhe privat, gjimnaze, shkolla 9-vjeçare, kopshte, çerdhe dhe kinema të re.
Ai kërkoi durim dhe bashkëpunim nga ana e qytetarëve teksa puna vijon të kryhet:
“Përveç projekteve që po ndjekim me Ministrinë e Transporteve dhe ‘Cooperazione Italiana’, duke përfshirë kinemanë, dy rrugë, 3 blloqe banimi dhe rehabilitim urban, edhe blloqet që i kemi filluar pranë spitalit ushtarak, blloku numër 1, rruga “Egnatia”, ndaj u kërkoj të gjithë qytetarëve pak durim teksa puna ecën shpejt dhe sigurisht, pak bashkëpunim aty ku do të duhet që të tërheqim një avlli apo një gardh, për t’u siguruar që çdo gjë të bëhet sipas standardeve, me trotuare dhe gjithë hapësirën e nevojshme”, theksoi Veliaj. (XH.A/SHUPLAKA)
