Prej disa ditësh, në media është raportuar për debatin lidhur me blerjen dhe importimin e energjisë elektrike. Ndërkohë vetëm dje, VKM për blerje të energjisë elektrike ka kaluar me shumicë të thjeshtë në Këshillin e Ministrave. Madje edhe me votat pro të tre ministrave teknikë të PD-së, ndërkohë që katër prej tyre kanë votuar kundër.
Ky vendim vjen pas bllokimit që ministrat e PD i bënë kredisë 22 mln euro të Bankës Botërore për blerjen e energjisë. Mësohet se kundër kanë qenë zv/kryeministrja Mandija, ministri i Drejtësisë Gazmend Bardhi, ministrja e Mirëqenies Sociale Xhuljeta Kërtusha dhe ministrja e Financave, Helga Vukaj.
Pro VKM-së kanë votuar vetëm ministri i Brendshëm Dritan Demiraj, ministrja e Arsimit Mirela Karabina dhe ministri i Shëndetësisë Arben Beqiri.
Kujtojmë se gjatë këtij viti, VKM-të për blerjen e enegjisë elektrike janë kritikuar nga opozita, kjo edhe për shkak të çmimit.
VENDIMI
Vendimi u mor ditën e djeshme ku thuhet: Në zbatim të marrëveshjes së huas, të lidhur ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, në përmbushje të detyrimit e shërbimit publik në kushtet e një viti të pafavorshëm hidrik, dhe për një ndryshim në vendimin nr.244, datë 30.3.2016, të këshillit të ministrave.
Në mbështetje të nenit 100 të Kushtetutës, të ligjit nr.170/2014, “Për ratifikimin e marrëveshjes së huas, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, për financimin e projektit për rimëkëmbjen e sektorit të energjisë elektrike”, dhe të nenit 47, të ligjit nr.43/2015, “Për sektorin e energjisë elektrike”, me propozimin e ministrit të Energjisë dhe Industrisë, Këshilli i Ministrave
VENDOSI:
1-Blerjen e energjisë elektrike nga shoqëria “KESH”, sh.a. për përmbushjen e detyrimit të shërbimit publik ndaj Furnizuesit të Shërbimit Universal në kushtet e një viti të pafavorshëm hidrik. Blerja e energjisë elektrike të bëhet në zbatim të marrëveshjes së huas, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, ratifikuar me ligjin nr.170/2014, në varësi të nevojave dhe për aq sa e lejon vlera e fondit të akorduar nga kjo marrëveshje huaje.
2-Procedura që do ndiqet nga shoqëria “KESH”, sh.a. për blerjen e energjisë elektrike do të jetë në përputhje me parashikimet e marrëveshjes së huas, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, për financimin e projektit për rimëkëmbjen e sektorit të energjisë elektrike.
3-Në fund të pikës 3, të nenit 5, në tekstin që i bashkëlidhet vendimit nr.244, datë 30.3.2016, të Këshillit të Ministrave, shtohet fjalia me këtë përmbajtje: “Në raste përjashtimore dhe situata të pafavorshme hidrike, Këshilli i Ministrave mund të vendosë që sasia e nevojshme e energjisë për përmbushjen e kërkesave të klientëve që përfitojnë nga Shërbimi Universal i Furnizimit të sigurohet në tregun e parregulluar nga shoqëria e prodhimit të energjisë elektrike, aksionet e së cilës kontrollohen pjesërisht apo plotësisht nga shteti.”.
4-Ngarkohen Ministria e Energjisë dhe Industrisë dhe shoqëria “KESH”, sh.a. për zbatimin e këtij vendimi. Ky vendim hyn në fuqi pas botimit në Fletoren Zyrtare. (D.D/Shuplaka)
