Për zgjedhjen e trajnerit të ri të Kombëtares Shqiptare ka reaguar dhe kreu i grupit Parlamentar të LSI-së, Petrit Vasili. Ai thotë se zgjedhja e teknikut Italian në krye të stolit kuqezi është një lajm i mirë për të gjithë tifozët.
Po ashtu Vasili e konsideron zgjedhjen e Panuccit si mjaft të goditur që siguron vazhdimësinë dhe premisa të mëdha për rezultate të tjera të suksesshme të kuqezinjve.
“Panucci, një lajm i mirë për kombëtaren dhe për të gjithë tifozët. Ish-futbollist i madh, që vjen nga një shkollë e madhe futbolli dhe trainerësh si Italia. Zgjedhje e goditur që siguron vazhdimësinë dhe premisa të mëdha për rezultate të tjera të suksesshme të kuqezinjve”, shkruan Vasili.
Po kush është Christian Panuçi:
Panuçi është një mbrojtës i njohur në Serinë A italiane. Ai e ka nisur karrierën te Xhenoa në vitin 1990, ndërkohë që pas tri vitesh u transferua te Milan, ku fitoi edhe Champions në sezonin 1993-1994. Në 1996 ndoqi Kapelon në Spanjë, duke u bërë pjesë e Real Madridit, me të cilën fitoi dhe La Ligan në 1997 dhe Champions një vit më vonë.
U rikthye në Seria A në vitin 1999 tek Interi dhe në sezonin pasardhës u huazua në Londër, te skuadra e Çelsit e më pas kaloi te Monako. Në vitin 2001 rikthehet sërish në Itali te Roma, sërish nën drejtimin e Kapelos, ku qëndroi për tetë vite. Panuçi ka qenë një ndër mbrojtësit më të mirë në Itali, teksa i dha fund karrierës në vitin 2010 te Parma. Me kombëtaren italiane ka zhvilluar 58 ndeshje, duke shënuar 4 gola.
Pasi vari “këpucët në gozhdë”, Panuçi nis karrierën si komentator sportiv në “Sky Italia” në vitin 2011, ndërkohë që më vonë u bë dhe pjesë e spektaklit “Dancing Ëith the Stars”. Në vitin 2012 u zyrtarizua te Palermo për t’u bërë menaxher dhe zbulues talentesh, ku qëndroi vetëm disa muaj.
Po në këtë sezon nis karriera e tij në pankinë. Ai bëhet ndihmës i Fabio Kapelos te Rusia, por largohet nga detyra pas dy vitesh pas përplasjeve që pati me të. Në 2015-ën mori drejtimin e Livornos në Serinë B, teksa e drejtoi këtë skuadër në 36 ndeshje, ndërkohë që në gushtin e vitit të kaluar drejtoi Ternanën.
(E.K/SHUPLAKA)
