Humbje turpëruese në Europë, nuk përmbahet Gjici: Vërini gishtin kokës, harram i paçin lekët nëse…

Një ndër gjërat më të vështira është të flasësh me Safet Gjicin pas një humbjeje. Në kupat e Europës për më tepër… Dhe jo një humbjeje dosido, por 3-0…!

I revoltuar pa masë ka qenë presidenti i Kukësit pas disfatës së nënkampionëve dje kundër Debrecenit. Ishte një nga ato ndeshje paradoksale, ku verilindorët zhvilluan një pjesë të parë mbresëlënëse me raste të pastra dhe më pas dolën të mundur nga një rezultat pothuajse të pashpresë për ndeshjen e kthimit.

“E pabesueshme çfarë kanë humbur lojtarët e mi sot. Gjithë ato raste në pjesën e parë dhe nuk shënojnë dot një gol. E pabesueshme. Jam pa fjalë”, thotë Gjici ekskluzivisht për “Panorama Sport”. Kreu i klubit kuksian e ka të vështirë të kapërdijë gola si ata të pjesës së dytë.

“Nuk mundet që të pësohen gola të tillë amatoreskë. Ndiej keqardhje të madhe sepse zhvilluan një pjesë të parë shumë të mirë dhe në të dytën u ndëshkuan nga disa gafa amatoreske. Jam thellësisht i zhgënjyer dhe i revoltuar njëkohësisht. Nuk mundet ta pranoj një disfatë si kjo”, ka vazhduar më tej Gjici.

ULTIMATUMI

Safet Gjici nuk pajtohet dot me idenë se Kukësi tani e ka mision thuajse të pamundur kualifikimin. Humbja 3-0 kundër Debrecenit në transfertë mund të demoralizojë gjithë tifozët e Kukësit, madje edhe një pjesë të mirë të lojtarëve, por jo Gjicin.

Përkundrazi, ai i bën një apel të fortë skuadrës dhe stafit, duke u kërkuar që të reflektojnë dhe të gjejnë mënyrën për ta kaluar turin e parë. “Duhet t’i vënë gishtin kokës dhe të kalojnë në Shqipëri turin e parë. E kanë pasur detyrim që të kalojnë turin e parë. Duhet të bëjnë të pamundurën për t’ia dalë”, ka deklaruar Gjici.

PREMIO 100 MIJË EURO

Kukësi është ndër ekipet e pakta shqiptare që ka premio “standarde” për çdo kualifikim. Gjici sistematikisht ka vënë shpërblim prej 100 mijë eurosh për skuadrën në çdo tur që ajo kalonte.

Edhe këtë herë, kjo traditë te klubi i Kukësit nuk është prishur. “Haram e paçin nëse nuk kalojnë. Nuk mund të sillen kështu. Kam vënë shpërblim 100 mijë euro, çfarë mund të bëj më tepër. Debreceni nuk ishte ekip i pakalueshëm. Mjafton që të bënin një gol aty dhe në Shqipëri të mbanim një barazim”, ka përfunduar kreu i klubit të Kukësit.