Presidenti i Republikës, Bujar Nishani priti sot në një takim kryetarin e Bashkimit Demokratik për Integrim në Maqedoni, Ali Ahmeti.
Biseda mes kreut të shtetit dhe Ahmetit u përqendrua kryesisht tek procesi zgjedhor në Maqedoni dhe rezultatet e partive politike shqiptare atje.
Nishani pasi e uroi Ahmetin për fitoren e subjektit të tij politik në zgjedhje, vlerësoi angazhimin dhe kontributin e të gjitha subjekteve politike shqiptare në procesin zgjedhor si dhe në proceset demokratizuese dhe integruese të Maqedonisë, thuhet në njoftimin e Presidencës.
Presidenti Nishani nënvizoi prioritetin që Shqipëria u jep marrëdhënieve të fqinjësisë së mirë dhe partneritetit me Maqedoninë duke theksuar rëndësinë që ka garantimi i të drejtave të shqiptarëve në Maqedoni si një komponent shtetformues dhe garantues i stabilitetit atje.
Të dy bashkëbiseduesit ndanë të njëjtin mendim se proceset e integrimit euro-atlantik janë thelbësore dhe përfaqësojnë interesin më madhor të të dyja vendeve, por edhe të rajonit në tërësi.
Discussion about this post