Përmbytjet, Basha-Ramës: Merrni masa, ndihmojini njerëzit që janë në rrezik për jetën

Pas debateve të njëpasnjëshme që kanë mbërthyer sot seancën plenare, kryetari i Partisë Demokratike, Lulzim Basha, doli nga rendi i ditës së sotme ku diskutohej për projekt-buxhetin e vitit 2018 duke shtruar problemin për sigurinë e popullit pas përkeqësimit të motit.
Basha në fjalimin e tij u shpreh se kishte infomacione se në Shkodër mungonte totalisht shërbimi shëndetësor dhe urdhëroi maxhorancën të marrin masat për t’i ndihmuar njerëzit që janë në rrezik për jetën.
“Informacioni që më vjen mua nga Shkodra, mungon totalisht shërbimi shëndetësor në veçanti për fëmijët, nënat e pleqtë. Kjo është jashtë rendit të ditës. Kordinohuni me pushtetin vendor për t’u organizuar në terren. Ka pamundësi kontakti me pushtetin qëndror. Merrni masat për t’i ndihmuar njerëzit që janë në rrezik për jetën. Është detyra dhe ekzistenca numër 1 e shtetit,” tha Basha.
Ka qenë i menjëhershëm reagimi i kryeministrit Rama i cili është shprehur se përmbytjet ishin parashikuar dhe kemi marrë çdo masë të mundshme për ta përballuar këtë vështirësi.
“Këto përmbytje janë të parashikuara, dhe duke qenë se kemi pasur disponim mbi parashikimet kemi marrë çdo masë të mundshme për ta përballuar këtë vështirësi. Nuk përballohet me teatër e shfaqje filmash në rrugë. Tani që flasim të gjitha forcat e organizuara e emergjnencave, të policisë e ushtrisë janë të angazhuara. Edhe përsa i përket shërbimit shëndetësor, është në gadishmëri të plotë. Në vlerësim të lartë për ndërhyrjen tuaj z.Lulzim ne jemi në gadishmëri prej më shumë se një jave se kemi marrë parashikimet,” tha Rama.(M.Q/Faxweb)