Drejtoria e Forcës së Posaçme Operacionale finalizoi me sukses operacionin policor të koduar “Operacionalja 36”, duke vënë në pranga në qytetin e Durrësit shtetasin egjiptian Walid Elabd, 49 vjeç.
Ai ishte shpallur në kërkim ndërkombëtar nga autoritetet italiane, pasi akuzohet për krijimin e një organizate kriminale në Itali, me qëllim trafikimin e qenieve njerëzore. Arrestimi u bë i mundur falë bashkëpunimit mes Policisë së Shtetit dhe homologëve italianë, nëpërmjet Interpol Tiranës.
Policia e Shtetit
Finalizohet nga Drejtoria e Forcës së Posaçme Operacionale, operacioni policor i koduar “Operacionalja 36”.
Akuzohet se krijoi në Itali, një organizatë kriminale për trafikim të qenieve njerëzore, kapet në Durrës, 49-vjeçari nga Egjipti.
Si rezultat i koordinimit të informacioneve dhe veprimeve policore, me homologët italianë, nëpërmjet specialistëve të Interpol Tiranës, Drejtoria e Forcës së Posaçme Operacionale, në kuadër të operacionit “Operacionalja 36”, kapi në Durrës dhe vuri në pranga shtetasin e shpallur në kërkim ndërkombëtar, për llogari të Italisë, W. E., 49 vjeç, të lindur në Egjipt.
Gjykata e Katanias, Itali, ka lëshuar urdhër arresti për këtë shtetas, për veprën penale “Trafikimi i qenieve njerëzore”, kryer në kuadrin e organizatës kriminale.
Për këtë veprimtari kriminale ligji në Itali parashikon si dënim maksimal 20 vjet burgim.
Interpol Tirana vijon bashkëpunimin me Interpol Romën, për të finalizuar procedurën për ekstradimin e 49-vjeçarit, në Itali.
