PD e bashkuar në aksionin opozitar? Salianji: Nuk zgjidhen problemet vetëm me vendim gjykate, por jam i bindur se do kemi një kandidat të përbashkët

I pyetur se a është PD  e bashkuar në aksionin e saj opozitar duke qenë se dhe zgjedhjet lokale janë afër, deputeti Ervin Salianji u përgjigj duke thënë se kjo varet nga vullneti i përfaqësuesve të kësaj force politike.

Salianji  theksoi se problemet e brendshme nuk i zgjidh një vendim Gjykate dhe as deklaratat për shtyp por megjithatë ai shprehu bindjen se Partia Demokratike do të dalë me një kandidat të përbashkët për zgjedhjet e pushtetit vendor.

Pyetje: Vendimi i vonuar nga gjykata për drejtuesin legjitim të PD-së, a është Partia Demokratike e bashkuar në aksionin opozitar dhe sa e pengon titullari në çuarjen e këtij aksioni deri në fund? Përgatitjet tuaja për zgjedhjet vendore?

Salianji: Detyrimi i çdo deputeti është që delegimin e pushtetit që kanë dhënë qytetarit ta ruajë duke bërë opozitë ndaj qeverisë sesa të merret me çështjet e brendshme. Sigurisht kemi probleme brenda partisë por nuk zgjidhet me konferenca dhe deklarata për shtyp, çështja nuk zgjidhet vetëm me vendim gjykate, normalisht ajo duhet të veprojë sa më shpejt por përtej kësaj, çështja zgjidhet me vullnet të përfaqësuesve të saj, barra më e madhe për drejtuesit e pjesëve, ata të japin zgjidhje dhe të dalin me një kandidat. Çdo devijim,  do jemi këtu dhe do e komunikojmë. Ka vetëm një Parti Demokratike, jam i bindur që do dalim me një kandidat.