Përplasje me armë në furrën e bukës, plagoset një person

Një 60 vjeçar është plagosur me armë gjahu rreth orës 05:15 të mëngjesit të kësaj të hëne. I lënduari E.K. 60-vjeç është dërguar menjëherë në spital.

Ndërkohë që policia ka arrestuar autorin e ngjarjes S. T., 26 vjeç, banues në Kavajë.

Dy personat ishin konfliktuar me njëri- tjetrin për shkak të një konflikti pronësie, ku debati ka degjeneruar në përplasje me armë. 60 vjeçari E.K. është pronar I furrës së bukës ku ka ndodhur përplasja.

Njoftimi i plotë i policisë:

Plagos me armë gjahu një shtetas, identifikohet, kapet dhe arrestohet në kohë rekord nga Policia e Kavajës.

Shërbimet e Policisë Kavajë, identifikuan, kapën dhe arrestuan në kohë rekord shtetasin:

S. T., 26 vjeç, banues në Kavajë

Ky shtetas rreth orës 05:15 të mëngjesit të sotëm, në qytetin e Kavajës në ambientet e një furre buke, për shkak të një konflikti pronësie ka plagosur me armë gjahu pronarin e furrës, shtetasin E. K., 60 vjeç, i cili ndodhet në spital nën kujdesin mjekësor.

Materialet i kaluan për veprime të mëtejshme Prokurorisë së Rrethit Gjyqësor Kavajë në ngarkim të shtetasit S. T., për veprën penale “Vrasje me dashje e mbetur në tentativë”, parashikuar nga nenet 76 dhe 22 të Kodit Penal.