Lefter Koka ka konfirmuar çarjen e tij me LSI-në dhe faktin që nuk do të dorëzojë mandatin e deputetit. Në një reagim të minutave të fundit Koka ka shpërthyer në akuza dhe në drejtim të ish-kryeministrit Sali Berisha dhe kreut aktual të PD-së Lulzim Basha.
Koka akuzon Berishën se ende në shekullin e 21 kërkon që zgjidhja të vijë përmes plumbave.
Lëkundja e Kokës për të lënë mandatin u përfol prej ditës së djeshme, kur ai nuk shkoi në mbledhjen e grupit të LSI-së, ku u vendos djegia e mandateve.
Koka shton se mandati i tij nuk mund të përdoret për t’iu vënë flakën institucioneve të shtetit.
Reagimi:
Opozita dje mori vendimin për të djegur mandatet e deputetit. Vendimi im i palëkundur është se unë nuk do të djeg mandatin e deputetit, që mijëra durrsakë më kanë besuar. I zgjedhur prej vullnetit të bashkëqytetarëve të mi, për të ushtruar pushtetin legjislativ dhe të jem përfaqësuesi i tyre.
Parimet e mia në 2 dekada te jetës sime politike janë udhëhequr vetëm nga interesi i qytetarëve. Janë ata që me kanë treguar gjithmonë cila është e drejta dhe e vërteta, janë ata bashkëudhëtarët dhe udhërrëfyesit e mi.
Ky nuk është një vendim thjeshte i Lëvizjes Socialiste për Integrim por i Saliut, i cili në shekullin e 21 bën thirrje për plumba ballit. Dhe nese erdhi dita që ai të tërheqë zvarrë LSI , a thua se LSI është Luli, nuk mund të më tërheqë zvarrë mua drejt aventurave qe une i gjykoj të turpshme për shoqërinë shqiptare dhe demokracinë.
Mandati im është besimi i mijëra qytetarëve. Është mandati i qytetarisë, kulturës dhe fisnikërisë durrsake , që as në ditët më të vështira të këtij qyteti nuk theu kurrë një xham. Qytetarët durrsakë kanë treguar në çdo kohë, se ata janë shembulli më i mirë i shoqërisë shqiptare. Mandati im nuk mund të përdoret asesi për t’i vënë flakën institucioneve shtetërore apo parlamentit shqiptar.
Thellësisht mirënjohës për të përfaqësuar sa më denjësisht zërin tuaj!
Në një reagim të mëngjesit të sotëm Jamarbër Malltezi deklaronte se Koka është i detyruar që të hedhë vallen e Ramës, për shkak të një afere korruptive që ka firmosur në kohën kur ka qenë ministër. (LEXO KËTU)
(E.K/FAXWEB.AL)
