Vazhdon tensioni midis dy partive të koalicionit qeverisës PS dhe LSI. Kryeministri Edi Rama ka firmosur dorëheqjen e ministrit të Drejtësisë Ylli Manjani.
Sipas burimeve të brendshme të dy selive partiake, që raportojnë për “Shuplaka-n”, Manjani ka pranuar të japë dorëheqjen dhe e ka firmour atë. Madje ai ishte pregatitur të mbante edhe një konferencë për shtyp rreth orës 09:30 të mëngjesit të nesërm, por ka qenë pikërisht kreu i Kuvendit Ilir Meta, ai që e ka penguar.
Mesa duket Meta ka vendosur të japë një provë “force” ndaj PS-së, pasi sipas të njëjtave burime, në këto momente LSI kërkon dorëheqjen e ministrit të Punëve të Brendshme, Saimir Tahiri.
Ndërsa kryeministri Rama, pas kësaj kërkese të LSI-së, veç dorëheqjes së Manjanit kërkon edhe dorëheqjen e ministrit Lefter Koka.
Burimet nga selia e PS-së bëjnë me dije se Rama është rikthyer edhe njëherë në negociata për shkarkimin e ministrave të lartpërmendur.
“Shuplaka” mëson se ka shumë tension mes Ramës dhe Metës, dhe sipas debateve të deritanishme duket sikur është pranuar dorëheqja e Tahirit në shkëmbim të dy ministrave të LSI-së.
Për një moment kjo negociatë u quajt e përfunduar dhe pothuajse u arrit marrëveshja, por ministri Tahiri nuk ka pranuar të japë dorëheqjen.
“Unë nuk pranoj dorëheqje por vetëm shkarkim.”, mësohet të jetë shprehur ai.
Negociatat e tensionuara vazhdojnë ende në këto momente dhe nëse ecin me këtë ritëm, me shumë gjasa dita e nesërme do të gdhijë me tre ndryshime ministrash. (D.D/Shuplaka)
Discussion about this post